Kam me ardhë si deka

"Kam me ardhë si deka" është një titull tronditës, para të cilit s’mund të rrish indiferent. Jetës mund t’i shmangesh, por vdekjes kurrsesi, thoshte T. S. Elioti. Titulli i këtij libri sikur e zgjon jehonën intertekstuale eliotiane, duke e paraqitur ardhjen e dikujt si të pashmangshme, sepse ajo ka me ardhë, pashmangshëm, si vdekja. Kështu, në krejt librin ndihet kalërimi i asaj që është duke ardhur sikur vdekja. Dhe janë pikërisht këta tinguj në sfond, të një troku tronditës, që godasin gjoksin e lexuesit nga faqja e parë deri tek e fundit. Gjithandej nëpër vargje ndihet troku legjendar i asaj që është duke ardhur sikur vdekja, që është si vdekja, apo që, ndoshta, është vetë vdekja.